Сейм Польшчы прыняў пастанову аб прэзідэнцкіх выбарах у Беларусі
Дэпутаты ў зале пасяджэнняў Сейму ў Варшаве / PAP/Albert Zawada
Сейм Польшчы прыняў пастанову аб "прэзідэнцкіх выбарах" у Беларусі. За яе прагаласаваў 431 дэпутат, супраць — два. Ніхто не ўстрымаўся.
Супраць рэзалюцыі галасавалі два пазафракцыйныя дэпутаты — Раман Фрыц і Уладзімеж Скалік.
У сваёй рэзалюцыі польскія парламентары асудзілі адсутнасць празрыстасці і законнасці падчас беларускіх "выбараў". Таксама Сейм выказвае занепакоенасць палітычнай сітуацыяй у Беларусі і заклікае мінскія ўлады вызваліць і зняць абвінавачанні з усіх палітвязняў, у тым ліку Анджэя Пачобута.
Лідарка беларускіх дэмсілаў Святлана Ціханоўская падзякавала польскім дэпутатам, асабліва Камітэту па міжнародных справах, яго старшыні Паўлу Ковалю, а таксама парламентарам Аляксандры Вішнеўскай і Марціну Басацкаму: "Вашая салідарнасць надае нам сілу і надзею ў барацьбе за свабоду. Мы не спынімся, пакуль Беларусь не стане вольнай і незалежнай краінай Еўропы!"
