Серафімовіча абвінавачваюць у датычнасці да забойства 4144 чалавек

6 лютага Вярхоўны Суд Беларусі пачаў разгляд трэцяй крымінальнай справы аб генацыдзе беларускага народа падчас вайны. Сымона Серафімовіча абвінавачваюць у датычнасці да забойства 4144 чалавек (у тым ліку 626 дзяцей), паведаміў дзяржаўны абвінаваўца Аляксандр Дзямідаў.

Падчас нямецкай акупацыі Серафімовіч узначальваў падраздзяленне Мірскай раённай дапаможнай паліцыі (Карэліцкі раён), а з 1943-га — ўзмоцнены карны атрад дапаможнай паліцыі ў Баранавічах. Падкрэсліваецца, што ён не толькі дапамагаў акупантам, але і "асабіста прыняў удзел у шэрагу карных аперацый па знішчэнні мірнага насельніцтва, пераважна яўрэйскай нацыянальнасці". Дзеянні Сымона Серафімовіча кваліфікаваныя як генацыд (арт. 127 КК).

У крымінальнай справе 30 тамоў. Па справе праходзяць 54 сведкі.

Серафімовіч памёр 7 жніўня 1997 года ў Вялікабрытаніі (дарэчы, там яго яшчэ пры жыцці судзілі як вайсковага злачынцу, але да канца справу не давялі з-за смерці абвінавачанага). Раней у Беларусі ўжо судзілі памерлых — украінцаў Уладзіміра Катрука і Канстанціна Смоўскага за карную аперацыю ў Хатынь. Іх прызналі вінаватымі, але без прызначэння пакарання.

У Беларусі ў часы Аляксандра Лукашэнкі судзяць нават мёртвых нацысцкіх катаў, якія пазбеглі адказнасці. Бальшавіцкіх катаў не судзяць — камуністычныя злачынствы ў РБ не расследуюцца. Нядаўна "экстрэмісцкімі" прызналі дакументальны фільм і кнігу пра сталінскія рэпрэсіі.