Санкцыі банка PKO закрануць толькі новых кліентаў
Банк PKO, ілюстрацыйнае фота / Shutterstock
Буйны польскі банк папярэдзіў, што будзе закрываць рахункі грамадзянаў Беларусі без польскіх відаў на жыхарства. Але мы даведаліся: большасці беларускіх кліентаў PKO Bank Polski хвалявацца няма пра што.
Як сказалі журналісту Еўрарадыё ў банку, сённяшняя рассылка непрыемных паведамленняў звязаная з санкцыямі, уведзенымі Еўрасаюзам у сярэдзіне кастрычніка. Уведзеныя абмежаванні будуць тычыцца толькі новых кліентаў, якія адкрылі рахункі 24 кастрычніка 2025 года і пазней.
Супрацоўніца банка расказала, што сама не да канца разумее, як працуюць новыя санкцыі. Але з таго, што ёй і іншаму персаналу даводзілі ў аддзяленні, яна зразумела: тых, хто адкрыў рахункі да 24 кастрычніка, абмежаванні не закрануць.
У сераду, 3 снежня, банк PKO папярэдзіў некаторых беларусаў, што іх рахункі могуць заблакаваць, калі яны не пададуць дзейныя віды на жыхарства ў Польшчы. Пагражаюць адключэннем інтэрнэт-банкінгу, хуткіх пераводаў і блакаваннем картак.
