Рэжысёр фільма пра Потэра расказаў, што думае пра новы серыял. Зайздросціць?

Рэжысёр першых трох фільмаў пра Гары Потэра Крыстафер Каламбус не зайздросціць камандзе, якая працуе над серыялам па матывах кнігі Джоан Роўлінг для стрымінгавага сэрвісу HBO.

Рэжысёр лічыць, што яму больш няма чаго рабіць у свеце Гары Потэра, бо яго версію гэтай сусвету гледачы ўжо бачылі.

"Я вельмі ганаруся гэтымі фільмамі, першымі трыма, у якіх я ўдзельнічаў, і я рухаюся далей", — цытуе рэжысёра часопіс Variety.

Сваім поглядам на будучы серыял ён падзяліўся з аўтарамі падкаста The Rest Is Entertainment. Каламбус прызнаўся, што быў здзіўлены, калі ўбачыў вобраз аднаго з герояў — Хагрыда. На яго погляд, касцюм персанажа толькі злёгку адрозніваўся ад таго, які гледачы бачылі ў фільме шмат гадоў таму.

"І вось я бачу гэтыя фатаграфіі… і [Нік Фрост] апрануты дакладна ў такі ж касцюм, які мы прыдумалі для Хагрыда. Унутры мяне ўзнікла пытанне: у чым сэнс?" — кажа ён.

Ён прызнаецца, што чакаў ад аўтараў серыяла цалкам новага падыходу да старых персанажаў.

Прем’ера серыяла пра Гары Потэра запланавана на 2027 год. Каламбус мяркуе, што аўтары змогуць уключыць у яго эпізоды, якія яму самому давялося вырэзаць праз абмежаванні ў вытворчасці фільма. Працуючы з серыялам, можна дазволіць сабе большы хранаметраж.