Расія хоча пабудаваць у Беларусі завод па вытворчасці беспілотнікаў

Расія хоча пабудаваць у Беларусі завод па вытворчасці беспілотнікаў магутнасцю да 100 тысяч адзінак за год. Пра гэта паведаміў намеснік кіраўніка Адміністрацыі прэзідэнта РФ Максім Арэшкін. Паводле яго слоў, гэта "прапанова". Плануецца, пабудаваць завод на працягу года. "Цяпер з калегамі будзем абмяркоўваць і ўзгадняць параметры", — сказаў Арэшкін.

Намеснік кіраўніка Адміністрацыі прэзідэнта РФ знаходзіцца ў Беларусі. У Мінску была арганізаваная выстава найноўшых расійскіх беспілотнікаў. У чацвер яе наведаў Аляксандр Лукашэнка.

Як вядома, рэжым Лукашэнкі зацікаўлены ў развіцці ўласных вытворчасцяў беспілотнікаў, у тым ліку з мэтай іх паставак у Расію. А ці не зробіць з'яўленне ў РБ расійскага завода яго "законнай цэллю" для ўдараў? "Вельмі важна, каб у Беларусі былі ўласныя вытворчасці, якія рабілі б не толькі эканоміку, але і сферу бяспекі краіны па-сапраўднаму суверэннымі, — гаварыў у Мінску Максім Арэшкін. — Гаворка пра тое, каб выкарыстоўваць тэхналагічныя напрацоўкі і рашэнні, якія ёсць у Расіі".

Відаць, пытанне пабудовы завода ўжо вырашанае. "Завод, які знаходзіцца ў Беларусі, цалкам лакалізаваны, з прыўнясеннем усіх тэхналагічных кампетэнцый сюды, адначасова працуе на адзінай тэхналагічнай платформе з заводамі ў Расіі і іншых краінах", — так апісаў перспектывы Арэшкін. Ён падкрэсліў, што РФ і РБ трэба сінхранізаваць супрацоўніцтва ў сферы развіцця беспілотнікаў.

У пытанні развіцця беспілотных авіяцыйных сістэм Аляксандр Лукашэнка прапанаваў сфарміраваць у Беларусі групу спецыялістаў і накіраваць іх у Расію "для дадатковай падрыхтоўкі па самых перадавых напрамках". "Каб вы навучылі ўсіх нашых, якія будуць працаваць, і жадаючых", — сказаў ён.