Расце колькасць спроб незаконнага пераходу польскай мяжы
З-за сітуацыі з мігрантамі на польска-беларускай мяжы пачалі ўзводзіць загароду / Reuters
Расце колькасць спроб незаконнага пераходу польскай мяжы. Некалькі дзён запар польскія памежнікі паведамлялі ў сярэднім аб 200 спробах на дзень. У чацвер было прадухілена ўжо каля 300 парушэнняў мяжы.
За суткі ў Падляскім ваяводстве памежнікі спынілі 298 незаконных спроб трапіць у Польшчу.
Трое нелегальных мігрантаў затрыманыя. Усе яны — грамадзяне Ірака. Астатніх мігрантаў адправілі назад у Беларусь.
Польшча, Літва і Латвія ў апошнія месяцы сутыкнуліся з вялікім патокам нелегальных мігрантаў, якія спрабуюць трапіць туды з тэрыторыі Беларусі. Улады гэтых краін былі вымушаныя ўвесці на мяжы надзвычайнае становішча. У ЕС мяркуюць, што да стварэння міграцыйнага крызісу на мяжы датычныя беларускія ўлады. 8 верасня прадстаўніцтва ЕС у Беларусі аб'віла дэмарш беларускаму МЗС з гэтай нагоды і настойліва папрасіла "ўлады Беларусі спыніць гэтую практыку". У МЗС абвінавачванні абвяргаюць.
Еўрапейскія палітыкі нават прасілі прэзідэнта Расіі Уладзіміра Пуціна паўплываць на Аляксандра Лукашэнку. Але той адмовіўся гэта рабіць, таму што "нас не тычыцца, гэта не наша мяжа".
