Пуцін гатовы даць ЗША доступ да рэдказямельных металаў — сваіх і чужых

Прэзідэнт Расіі Уладзімір Пуцін заявіў, што гатовы даць ЗША доступ да рэдкіх мінералаў, у тым ліку на акупаваных Расіяй тэрыторыях Украіны, піша ВВС. Ён дадаў, што гэтая прапанова таксама можа прадугледжваць супрацоўніцтва дзвюх краін у галіне здабычы алюмінію.

Раней Крэмль не аднойчы з гонарам падкрэсліваў, што карысныя выкапні Расіі знаходзяцца ў руках яе грамадзян. У 2023 годзе ён абвінаваціў Захад, асабліва ЗША, у спробах "раздрабніць" Расію, каб атрымаць доступ да яе прыродных рэсурсаў.

Такую заяву Пуцін зрабіў неўзабаве пасля таго, як амерыканскі лідар Дональд Трамп заклікаў Украіну падпісаць з ЗША пагадненне аб доступе да яе карысных выкапняў. Трамп заяўляў, што вайсковая і эканамічная дапамога ЗША Украіне склала блізу 500 млрд долараў. Таму ён хоча, каб ЗША мелі доступ да ўкраінскіх карысных выкапняў на гэтую суму. Зяленскі аспрэчвае гэтую лічбу і настойвае, што такая ўгода павінна ўтрымліваць таксама гарантыі бяспекі для Украіны.