Пуцін будзе размяшчаць сілы на тэрыторыі Беларусі — Зяленскі

Пуцін будзе правакаваць краіны NATO і пастараецца ўцягнуць Беларусь у вайну. Пра гэта заявіў прэзідэнт Украіны Уладзімір Зяленскі.

На думку ўкраінскага прэзідэнта, Пуцін зробіць усё, каб вайна не спынялася. Наступнай цэллю ён можа выбраць Польшчу ці балтыйскія краіны.

"Вы ўбачыце: увесну, улетку ці ўвосень ён будзе размяшчаць сілы на тэрыторыі Беларусі. І многія еўрапейцы, а можа, і ЗША, будуць казаць, што гэта застрашванне, застрашванне Польшчы, застрашванне Літвы ды іншых балтыйскіх нашых партнёраў. Ён будзе думаць, як уцягнуць іх, ён будзе правакаваць іх", — заявіў Зяленскі.

Прэзідэнт украіны падкрэсліў, што не ведае, ці наважыцца Расія на ўварванне ў яшчэ адну краіну, але "ў кожным разе такім чынам зацягне Беларусь у вайну".

Зяленскі нагадаў, што ў першыя дні шырокамаштабнай расійскай агрэсіі Украіна была атакаваная ракетамі з тэрыторыі Беларусі. Ён адзначыў, што афіцыйны Мінск стаў саўдзельнікам расійскай агрэсіі: "Але людзі — не, войска — не. Пакуль што. Але Пуцін гэтага вельмі хоча".