Прысуд гвалтаўніку беларускі Лізы і смерць Дэвіда Лінча — Кубачак кавы
Галівудскія пагоркі ў полымі (ШІ-выява) / Mashable India
Добрага пятнічнага вечара! З вамі Тарас Тарналіцкі з Еўрарадыё і кароткі агляд важных тэм, на якія наша рэдакцыя звярнула ўвагу цягам мінулага тыдня.
А за апошнія сем дзён шмат што адбылося. Мы выпусцілі падкаст з ваенным добраахвотнікам “Джынам”, які падзяліўся сваёй перапіскай з маці. Паразмаўлялі з беларусам Андрэем, які назіраў, як згарае частка Лос-Анджэлеса. Пабывалі на агучванні прысуду Дарыяну С. — гвалтаўніку, што летась забіў беларуску Лізу. І пакапаліся ў фільмаграфіі майстра кінасюррэалізму Дэвіда Лінча, які літаральна днямі памёр ад эмфізэмы лёгкіх.
Нас чакае невялікая і натхняльная вандроўка. Хапай кубачак кавы — і пачнём.
Размова добраахвотніка з бацькамі
Пра што думаюць жаўнеры, ваюючы на ўкраінскім фронце?
Акрамя пастаўленых камандаваннем мэтаў і жадання выжыць яны думкамі з блізкімі людзьмі.
Гісторыю іх ліставання пераказвае серыя падкастаў Еўрарадыё "Як ты?". У ёй расказваецца пра тое, пра што ваяры маўчаць, калі на пытанне "Як ты?" проста адказваюць: "Я ў парадку".
Першы выпуск прысвечаны Міколу з пазыўным “Джын”. Хлопец ваюе сярод беларускіх добраахвотнікаў і абараняў горад Курахава на Данеччыне, які нядаўна занялі расійскія войскі.
Галівуд у полымі
Багатыя таксама плачуць — асабліва калі іх маёмасць знішчае некантраляваная стыхія.
Больш за тыдзень Заходняе ўзбярэжжа ЗША, дзе знаходзіцца горад амерыканскай кінаіндустрыі Лос-Анджэлес, пакутуе ад пажараў. За гэты час сотні тысяч чалавек былі эвакуяваныя, дзясяткі тысяч будынкаў згарэлі, а дзясяткі чалавек загінулі.
Еўрарадыё паразмаўляла з беларусам Андрэем, які ўжо больш за два гады жыве недалёка ад Галівуда. Ён расказаў, як горад мрояў перажывае катастрофу.
