Праваабаронцы выступаюць супраць новай пасады ў дэмсілах

Новую пасаду — упаўнаважанага па правах грамадзян Беларусі прапанавала ўвесці Каардынацыйная Рада. Праект стварэння інстытута ўпаўнаважанага па правах грамадзян Беларусі разглядаўся на апошніх слуханнях КР.

Але супраць гэтай прапановы выступілі праваабаронцы. У сваёй заяве яны кажуць, што ў сённяшніх умовах такая структура будзе неэфектыўнай і не апраўданай.

Праваабаронцы мяркуюць, што прапанаваны мандат — занадта шырокі і дублюе дзейнасць ужо наяўных праваабарончых арганізацый, грамадзянскіх ініцыятыў і міжнародных механізмаў. Да таго ж у нармальнай дзяржаве такі ўпаўнаважаны мае іншыя статус і магчымасці, у тым ліку бюджэтнае фінансаванне і рэальныя паўнамоцтвы. У выгнанні ж такая структура будзе толькі фармальнай і сімвалічнай.

Праваабаронцы таксама крытыкуюць назву — "па правах грамадзян Беларусі". Паводле іх, гэта супярэчыць міжнародным стандартам, бо ўпаўнаважаны мусіць абараняць правы ўсіх людзей, а не толькі грамадзян краіны. Да таго ж, звароты з тэрыторыі Беларусі да такой структуры могуць быць небяспечнымі для людзей, асабліва калі рэжым Лукашэнкі абвесціць сам інстытут упаўнаважанага "экстрэмісцкім".

Праваабаронцы прапануюць дэмсілам замест гэтага стварыць асобную пазіцыю, адказную за абарону правоў беларусаў у выгнанні. Такая структура магла б узаемадзейнічаць з замежнымі інстытутамі і была не проста фармальнай.

Пад зваротам падпісаліся Беларускі Хельсінкскі Камітэт, праваабарончы цэнтр "Вясна", Human Constanta, "Прававая ініцыятыва", Беларускі ПЭН ды іншыя праваабарончыя арганізацыі.