Пра махлярства з візавымі запісамі папярэджвае беларусаў кампанія VFS Global

Беларусы, якія запісваюцца на падачу візы, павінны быць пільнымі і пазбягаць агентаў ці пасярэднікаў. Да гэтага заклікае кампанія VFS Global, якая абслугоўвае ў Беларусі дыпламатычныя місіі 16 краін.

У кампаніі нагадваюць, што запіс на візу бясплатны і ажыццяўляецца толькі праз яе афіцыйны сайт www.vfsglobal.com.

Цяпер кампанія VFS Global абслугоўвае дыпламатычныя місіі Аўстрыі, Нарвегіі, Украіны, Ірландыі, Чэхіі, Грэцыі, Эстоніі, Венгрыі, Даніі, Харватыі, Літвы, Вялікабрытаніі, Фінляндыі, Польшчы, Дамініканскай Рэспублікі, Латвіі.

У VFS Global кажуць, што махляры выдаюць сябе за супрацоўнікаў або партнёраў VFS Global і падманваюць заяўнікаў, абяцаючы больш ранні запіс на візу за дадатковую аплату. У такіх выпадках кліентам рэкамендуюць неадкладна спыніць кантакты і давяраць толькі афіцыйным Ввізавым цэнтрам VFS Global.

У VFS Global таксама падкрэсліваюць, што ніколі не запытваюць персанальныя звесткі ці аплату праз сацсеткі. Супрацоўнікі кампаніі звяртаюцца да беларусаў з просьбай заўжды выкарыстоўваць афіцыйныя каналы VFS Global для бяспечнага афармлення візы і быць пільнымі, каб не трапіцца на ашуканскую схему.

Для барацьбы з махлярствам і большай бяспекі VFS Global укараніла ў Беларусі наступныя меры:
— уваход у візавыя цэнтры дазволены толькі заяўнікам з пацверджаным запісам;
— для запісу на падачу візы ў Польшчу ўведзеная сістэма распазнання твараў (выяву наведніка параўноўваюць з фатаздымкам у пашпарце), а асабістыя звесткі правяраюць падчас анлайн-запісу;
— фота заяўніка адлюстроўваецца ў сістэме запісу і ў пацвярджэнні запісу, а потым звяраецца з арыгіналам пашпарта ў візавым цэнтры;
— пры браніраванні запісу анлайн прымяняюць праверку IP-адрасу, каб пераканацца, што адну і тую ж прыладу выкарыстоўваюць як для верыфікацыі асобы, так і для доступу да запісу;
— для запісу на падачу візы ствараецца ўнікальны ўліковы запіс па нумары пашпарта;
— для ідэнтыфікацыі карыстальніка і абмежавання ўмяшання агентаў патрабуецца аднаразовы пароль, які адпраўляюць на электронную пошту заяўніку.