Польшча купіла ў ЗША "вялікі прынтар" для ўмацавання мяжы з Беларуссю і Расіяй
Прэзентацыя праекта ў Міністэрстве нацыянальнай абароны Польшчы / gov.pl
Польшча будзе ўмацоўваць мяжу з Беларуссю і Расіяй з дапамогай новых тэхналогій. Яна падпісала дамову з амерыканскай кампаніяй M. I. C. Industries, у якой купляе UBM (Ultimate Building Machine). Гэтую тэхналогію называюць таксама "вялікім прынтарам". Пра гэты праект паведаміў віцэ-прэм'ер, міністр нацыянальнай абароны Польшчы Уладзіслаў Касіняк-Камыш.
UBM аўтаматычна фармуе металічныя канструкцыі, якія потым хутка збіраюцца ў гатовыя будынкі. Яго тэхналогія нагадвае 3D-друк, але тут выкарыстоўваецца метал і пракатныя тэхналогіі, што робіць яго эфектыўным для масавага і хуткага будаўніцтва. Тэхналогія дазваляе хутка ўзводзіць хованкі, склады, ангары ды іншыя збудаванні для ваеннай і грамадзянскай абароны. Напрыклад, каманда з 10-12 супрацоўнікаў можа за адзін дзень вырабіць і сабраць канструкцыю плошчай 930 квадратных метраў.
Тэхналогію UBM Польшча плануе выкарыстоўваць для праекта "Шчыт Усход" — сістэмы ўмацаванняў на мяжы з Расіяй і Беларуссю.
