Полк Каліноўскага змяняе сваю структуру і кірунак дзейнасці

Полк імя Кастуся Каліноўскага заснаваў грамадскую арганізацыю і актывізуе палітычную дзейнасць. Пра гэта паведаміў камандзір палка Павел “Дзядзька” Шурмей у відэазвароце.

“Полк становіцца больш тэхналагічным і канчаткова пераходзіць да калегіяльнай мадэлі кіравання”, – сказаў ён. То бок усе ключавыя рашэнні ў падраздзяленні цяпер прымае Рада камандзіраў. Шурмей жа прызначаны часовым прадстаўніком руху для актывізацыі палітычнай дзейнасці.

У прэс-службе ПКК патлумачылі “Белсату” гэтыя змены “больш эфектыўным метадам кіравання”.

— Гэта патрэбны этап развіцця. Калегіяльны орган больш эфектыўны ў абставінах сучаснай вайны. Колькасць камандзіраў у Радзе зараз раскрыць не можам.

Што да перафарматавання палітычнай працы, у Палку таксама адзначылі, што гэта робіцца для большай эфектыўнасці.

— Мы прыйшлі да высновы, што нам неабходнае перафарматаванне органу палітычнага прадстаўніцтва палка дзеля больш эфектыўнага фармату працы. Мы плануем пашырыць прадстаўніцтва нашых ваяроў і ўсёй супольнасці, што склалася вакол палка, як ва Украіне, так і за яе межамі.

Таксама ў відэазвароце Шурмей паведаміў пра заснаванне ветэранскага руху —  грамадскай арганізацыі “Каліноўцы”. Яе афіцыйны прадстаўнік — Ян Мельнікаў. Адпаведную пастанову прыняла Рада камандзіраў.

У каментары “Белсату” каліноўцы ўдакладнілі, што арганізацыя ўжо створана ва Украіне. Яе мэта — адстойваць інтарэсы ветэранаў Палка імя Кастуся Каліноўскага, аказваць ім юрыдычнае падтрыманне і дапамагаць з легалізацыяй.