Полк Каліноўскага пракаментаваў затрыманне свайго былога байца

Полк Каліноўскага пракаментаваў затрыманне Васіля Грачыхі, якога беларускія спецслужбы назвалі былым байцом падраздзялення.

Прэс-служба палка пацвердзіла, што раней Грачыха быў у ў шэрагах падраздзялення. "Васіль Грачыха ў траўні 2022-га далучыўся да палка Каліноўскага і ў пачатку чэрвеня таго ж года пакінуў падраздзяленне. Што з ім адбывалася пасля гэтага, нам невядома", — цытуе выданне "Зеркало" адказ прэс-службы палка Каліноўскага.

Пра затрыманне Грачыхі стала вядома ўвечары 5 траўня. На дзяржаўных каналах выйшаў відэасюжэт, у якім прадстаўнікі КДБ прадэманстравалі дастаўку ў Беларусь экс-каліноўца. Пры гэтым не паведамлялася, дзе і калі адбылося затрыманне і якім чынам мужчына трапіў у рукі КДБ. Мяркуючы па навакольнай мясцовасці і голых дрэвах, затрыманне адбылося ўзімку ці на пачатку вясны.