Orlen будзе перавозіць нафтапрадукты з Літвы для Украіны праз Польшчу

Для "дэверсіфікацыі лагістычных магчымасцяў" і "забеспячэння стабільнасці паставак кліентам" Orlen купіла 100% акцый літоўскай кампаніі Mockavos Terminalas, а гэта дае кантроль над адзіным чыгуначным перагрузачным тэрміналам на польска-літоўскай мяжы ў Моцкаве. "Пастаўкі паліва ва Украіну забяспечаны", — кажа прэзідэнт польскай кампаніі Даніэль Обайтэк.

Летась Orlen паставіла ва Украіну 1 мільён тон нафтапрадуктаў. І рашэнне ўладаў Беларусі аб забароне транзіту з Літвы на планы на 2022 год ніяк не паўплывае, запэўнівае кампанія.

Улады Беларусі ўводзяць з 7 лютага забарону на транзіт па чыгунцы некаторых тавараў з Літвы (нафтапрадуктаў, хімічных і мінеральных угнаенняў), пагружаных на літоўскіх станцыях, як адказ на спыненне транзіту беларускіх калійных угнаенняў.