"Няхай ніводзін палітвязень не застанецца самотным" — Ціханоўская

21 траўня адзначаецца Дзень салідарнасці з палітвязнямі. Гэтая дата была заснаваная ў памяць пра загадкавую смерць палітвязня Вітольда Ашурка ў 2021 годзе ў шклоўскай калоніі.

З нагоды Дня салідарнасці з палітвязнямі Святлана Ціханоўская звярнулася да беларусаў.

"Кожны год 21 мая сэрца сціскаецца ад болю. Гэта Дзень салідарнасці з палітвязнямі. Палітвязні былі ў Беларусі заўсёды. Але тое, што адбываецца цяпер, — гэта маштабная трагедыя", — адзначыла лідарка беларускіх дэмакратычных сілаў.

Яна нагадала, шта на сённяшні дзень за кратамі знаходзяцца больш за тысячу чалавек, прызнаных палітвязнямі — журналісты і настаўнікі, медыкі і інжынеры, студэнты і пенсіянеры. іх аб'ядноўвае тое, што яны не згодныя жыць у хлусні і гвалце.

Палітык заклікала падтрымаць палітвязняў і іх сваякоў:

"Важна памятаць, што нават ва ўмовах татальнага кантролю і ціску мы не бездапаможныя. У гэты дзень я заклікаю вас:

— Пішыце лісты палітвязням. Нават некалькі цёплых словаў ад незнаёмага чалавека могуць сагрэць душу і падарыць надзею.

— Падтрымайце знаёмых, чые сваякі за кратамі. Прынясіце прадукты сталым бацькам зняволеных. Пагаварыце з сябрамі, якія сумуюць па сваіх партнёрах. Дайце адчуць, што яны не адны.

— Калі вы знаходзіцеся за мяжой — выкарыстайце магчымасць, каб нагадаць людзям пра сітуацыю ў Беларусі. Рабіце гэта асцярожна, каб не прыцягваць увагу рэжыму да канкрэтных асобаў за кратамі. Удзельнічайце ў акцыях салідарнасці, рабіце пасты анлайн і падтрымлівайце ініцыятывы".

Ціханоўская падкрэсліла важнасць кожнага кроку, кожнага ліста. Яна заклікала пашыраць салідарнасць: "Няхай ніводзін палітвязень не застанецца самотным. Свабоду палітвязням!"