"Мы павінны зноўку адкрыць Беларусь для прэзідэнта Трампа" — Ціханоўская

Кіраўніца Аб'яднанага пераходнага кабінета Беларусі Святлана Ціханоўская выказалася з нагоды ўступлення на пасаду новага прэзідэнта ЗША Дональда Трампа. Напярэдадні яна павіншавала Трампа і нагадала, што беларускі народ — саюзнік ЗША.

"Цяпер мы павінны зноўку адкрыць Беларусь для прэзідэнта Трампа, і паказаць важнасць Беларусі з новай перспектывы, — мяркуе Ціханоўская. — Мы павінны тлумачыць, што незалежная і свабодная Беларусь мае стратэгічна важнае значэнне для міру і бяспекі ва ўсім рэгіёне. І дэмакратычныя перамены ў нашай краіне адпавядаюць у тым ліку інтарэсам Злучаных Штатаў".

Па словах кіраўніцы АПК, ужо былі кантакты з прадстаўнікамі каманды новага прэзідэнта ЗША.

"Нашая мэта — растлумачыць, што Беларусь і Украіна ўзаемазвязаныя, што мы змагаемся з адным і тым жа ворагам, што без незалежнай Беларусі будуць пастаянныя пагрозы для Украіны, Польшчы, Літвы, усяго рэгіёну, — працягвае Святлана Ціханоўская. — З Лукашэнкам, які здае нашую краіну Пуціну, будуць пастаянныя правакацыі на межах, міграцыйныя крызісы і рызыка эскалацыі. А ў выпадку перамоваў па Украіне Беларусь не павінна стаць разменнай манетай ці нейкім суцяшальным прызам для Пуціна. І пазіцыя ЗША будзе граць вырашальную ролю ў гэтым".

Ціханоўская падкрэслівае, што "толькі дэмакратычная Беларусь можа стаць донарам стабільнасці, міру і надзейным партнёрам ЗША".