Міліцыя шукае гаспадароў матацыкла, на якім зламыснікі прыехалі рабаваць банк

Міліцыя Мінскай вобласці, расследуючы разбойны напад на банк, шукае гаспадароў матацыкла, на якім маглі прыехаць зламыснікі.

Як паведамляе аддзяленне інфармацыі і грамадскіх сувязяў УУС Мінскага аблвыканкама, здарэнне адбылося каля 17-й гадзіны 21 красавіка ў пасёлку Бярэзінскае Маладзечанскага раёна Міншчыны. Злачынец пагражаў работніку аддзялення "Беларусбанка" прадметам, падобным да пісталета і скраў 60 млн рублёў, пасля чаго ўцёк. Па звестках міліцыі, да злачынства маюць дачыненне двое маладых людзей.

У праваахоўнікаў ёсць падставы меркаваць, што зламыснікі ездзілі на матацыкле "ІЖ-Планета 4" без рэгістрацыйных нумароў. Гэты транспарт знайшлі недалёка ад месца здарэння. Высветліць, каму належыць матацыкл, міліцыя пакуль што не змагла.

Паведамляецца, што "ІЖ-Планета 4" мае шэраг характэрных прыкметаў. Матацыкл быў перафарбаваны ў сіні колер (заводскі колер — зялёны). Сядушка на ім абвязаная празрыстым скотчам. У мацаванні задняга паказальніка павароту, а таксама спідометра на рулявой частцы выкарыстаная сіняя ізастужка.

Супрацоўнікі міліцыі просяць усіх, хто мае інфармацыю пра ўладальнікаў матацыкла, або што-небудзь ведае аб разбойным нападзе, паведаміць у Маладзечанскі РАУС. Кантактныя тэлефоны: 8-017-677-16-56, 8-029-697-37-03, 8-029-753-99-40, 8-029-140-83-32.

Канфідэнцыйнасць і ўзнагароджанне гарантуецца.