Медалісткай Дыяментавай лігі стала беларуска, якая асудзіла рэпрэсіі і вайну

Медалісткай прэстыжных лёгкаатлетычных спаборніцтваў стала беларуска, якая асудзіла рэпрэсіі на радзіме і расійскую агрэсію супраць Украіны.

Беларуская скакуха ў вышыню Марыя Жодзік цяпер выступае за Польшчу. На спаборніцтвах Дыяментавай лігі ў Стакгольме яна ў нядзелю заняла трэцяе месца. Беларуска ўзяла планку на вышыні 1,93 метра. Лепшыя за яе вынікі паказалі толькі аўстралійка Нікале Оліслэджэрс (2,01) і алімпійская чэмпіёнка з Украіны Яраслава Магучых (1,99).

Для 28-гадовай Марыі Жодзік гэта стаў першы медаль на спаборніцтвах экстра-класа.

Марыя — ураджэнка Баранавічаў. У 2020 годзе яна падпісала адкрыты ліст спартоўцаў за свабодныя выбары і супраць гвалту сілавікоў. Пазней Жодзік асудзіла вайну Расіі супраць Украіны.

Цяпер беларуска трэніруецца ў беластоцкім клюбе Podlasie Białystok. Яна атрымала польскі пашпарт і летась ўдзельнічала ў Алімпіядзе ў Парыжы, хаця і няўдала.