"Маляваныча" не ўпусцілі ў Грузію
Аляксандр Ждановіч "Маляваныч"
Беларускага актора Аляксандра Ждановіча, больш вядомага як "Маляваныч", не пусцілі ў Грузію. Звесткі пра гэта з'явіліся ў тг-канале "Аксяродак. Беларускі цэнтр Батумі".
Маляваныч мусіў выступаць у Батумі перад мясцовымі беларусамі 15 жніўня.
"Больш за год мы не бачыліся, сумавалі і жылі рознымі тэмпамі і рознымі краінамі, і вось зноў сустрэча.
Анонс?.. Не ведаю. Прывязу кніжкі, пачытаю новыя казкі, раскажу пра жыццё ў Варшаве... Хіба так", — было пазначана ў анонсе.
Начаваць актор, як даведалася "Наша Ніва", будзе ў спецыяльным пакоі на тэрыторыі аэрапорта, абсталяваным для такіх выпадкаў. Яму дазволілі набыць ежу за свае грошы. Умовы ў пакоі, паводле Маляваныча, сціплыя: шконкі з матрацам, але без пасцелі, прыбіральня.
У 2020-м Ждановіч падтрымаў масавыя мірныя пратэсты і ў выніку быў вымушаны пакінуць Беларусь.
Гэта не першы выпадак, калі ў Грузію не ўпускаюць беларускіх палітуцекачоў. У верасні 2024-га не пусцілі Андрэя Мялешку, які перад гэтым жыў у Грузіі некалькі гадоў. У траўні 2025-га назад у Грузію не ўпусцілі Змітра Грынкевіча.
