Лукашэнка знайшоў "лялькаводаў" у Чэхіі і абразіў лідарак аб'яднанага штаба

10/08/2020 - 13:39

10 жніўня Аляксандр Лукашэнка пракаментаваў пратэсты, якія прайшлі ў Беларусі супраць фальсіфікацыі вынікаў прэзідэнцкіх выбараў. Як вядома, былі затрыманы тры тысячы чалавек, дзясяткі пацярпелі (і пратэстоўцы, і сілавікі), распачаты крымінальныя справы. Лукашэнка паабяцаў адэкватны адказ "на неправамерныя дзеянні" і што "майдана не будзе".

"Па адной размове мы бачым лялькаводаў, — цытуе словы Аляксандра Лукашэнкі president.gov.by. — Адна з ліній гэтых лялькаводаў — Чэхія. Сёння ўжо з Чэхіі кіруюць нашым аб'яднаным штабам".

Лукашэнка абразіў лідарак аб'яднанага штаба — Святлану Ціханоўскую, Марыю Калеснікаву і Вераніку Цапкала: "Сядзяць гэтыя авечкі, нічога не разумеючы, што ад іх хочуць".

Паводле Лукашэнкі, яны атрымлівалі з-за мяжы патрабаванні выводзіць людзей на вуліцу і весці "перамовы з уладамі аб добраахвотнай здачы ўлады". "Я пра Польшчу не кажу, — працягваў беларускі кіраўнік. — Там ужо ўсе аселі і таксама пачынаюць дзёргаць за нітачкі. Я не гавару пра Украіну (адтуль ехалі)". Праўда, у выпадку з Украінай Аляксандр Лукашэнка адзначыў, што гэта "не дзяржаўная палітыка, але там хапае гэтых майданутых".

Раней МУС заявіла пра 39 пацярпелых міліцыянерах. Лукашэнка заявіў, што толькі з АМАПу пацярпелі "каля 25 хлопцаў" — "пераломы рук, ног". "Мэтанакіравана білі па гэтых хлопцах, — гаварыў кіраўнік дзяржавы. — Яны адказалі. Чаго цяпер галасіць і плакаць?.. Краіну разарваць мы не дазволім".

Аляксандр Лукашэнка лічыць, што арганізатарам "масавых беспарадкаў" не ўдалося "распаліць пажар у цэнтры Мінска".

Таксама Лукашэнка паведаміў, што ў Навагрудку і Карэлічах былі спробы "штурмам" захапіць органы ўлады, што была спроба захапіць аддзел міліцыі. А ў нейкім горадзе на поўдні краіны пратэстоўцамі быў акружаны райвыканкам і "давялося памежнікам умяшацца". Таксама беларускі кіраўнік прызнаўся, што загадаў вайскоўцам і Службе бяспекі прэзідэнта на ваенных аўтамабілях вывезці членаў выбарчых камісій з заблакаваных будынкаў.

Тым не менш, выбары прайшлі як свята, лічыць кіраўнік Беларусі.