Летась беларусы атрымалі каля 157 тысяч шэнгенскіх візаў

Беларусы ў 2024 годзе атрымалі каля 157 тысяч шэнгенскіх віз (без уліку Грэцыі, Іспаніі і Харватыі, якія выдаюць візы праз расійскія дыппрадстаўніцтвы). Такую статыстыку апублікавала Еўракамісія.

Найчасцей візы грамадзянам Беларусі выдавалі Германія (50 459), Італія (49 588), Польшча (20 952), Венгрыя (13 9530 і Францыя (11 889). У гэтую статыстыку ўваходзяць толькі візы тыпу С — уласна шэнгенскія. Нацыянальныя візы тыпу D не ўлічваюцца.

У параўнанні з ранейшымі гадамі ўсе асноўныя краіны, дзе беларусы звычайна атрымліваюць візы, скарацілі іх выдачу. Польшча, напрыклад, зменшыла колькасць выдадзеных візаў амаль на траціну. Павялічыла выдачу віз толькі Італія — там адзначаны рост больш як на 10%.

Таксама варта адзначыць, што значна вырасла доля адмоваў. Пры атрыманні нямецкага "шэнгена" адмовы складаюць 2,6%, венгерскага — 2,3%, а ад дыпламатаў Францыі беларусы атрымлівалі адмовы ў візах у 6,2% выпадкаў.

Літва выдала грамадзянам Беларусі 3781 візу, Латвія — 967, а Чэхія — толькі 93.