Крымінальную справу супраць фонду BYSOL накіравалі ў суд

Пракуратура накіравала ў суд крымінальную справу "ў дачыненні да арганізатараў Фонду салідарнасці BYSOL і структурных падраздзяленняў Voices from Belarus і Digital Solidarity.

Справу расследавалі ў рамках спецыяльнай вытворчасці. Ёй займалася Гомельская абласная пракуратура.

У абвінавачанні фігурантам справы закідаюць дзейнасць ад пачатку студзеня 2020 года — яшчэ да эпідэміі кавіду.

"Абвінавачаныя не пазней за студзень 2020 года папярэдне аб'ядналіся ў злачынную супольнасць — экстрэмісцкае фармаванне By_help. Таксама ў яго склад увайшлі такія структурныя падраздзяленні, як Media Solidarity Belarus і "Беларусам.pl". Затым у жніўні 2020 года для пашырэння супрацьпраўнай дзейнасці яны аб'ядналіся з іншымі абвінавачанымі ў экстрэмісцкае фармаванне "Фонд салідарнасці BYSOL / Belarus solidarity foundation". А ў далейшым стварылі структурныя падраздзяленні Voices from Belarus і Digital Solidarity", — заяўляюць у пракуратуры.

Абвінавачанне выстаўленае па наступных артыкулах крымінальнага кодэкса:

прадастаўленне і збор грашовых сродкаў і іншай маёмасці для заведамага забеспячэння экстрэмісцкай дзейнасці (ч. 2 арт. 361-1 КК);
наўмысныя дзеянні, накіраваныя на ўзбуджэнне нацыянальнай і сацыяльнай варожасці паводле прыкметы нацыянальнай, моўнай і іншай сацыяльнай прыналежнасці (ч. 3 арт. 130 КК);
публічная абраза Лукашэнкі, злучаная з абвінавачваннем ва ўчыненні цяжкіх і асабліва цяжкіх злачынстваў (ч. 2 арт. 368 КК);
вярбоўка, навучанне, іншая падрыхтоўка і выкарыстанне людзей для ўдзелу на тэрыторыі замежных дзяржаў ва ўзброеных фармаваннях аднаго з супрацьлеглых бакоў, узброеных канфліктах, а таксама фінансаванне і іншае матэрыяльнае забеспячэнне такой дзейнасці (ч. 2 арт. 361-3 КК),
прапаганда тэрарызму і яго Ппублічнае апраўданне, у тым ліку з выкарыстаннем сеткі інтэрнэт (ч.1 арт. 289-1 КК).