Фонд BYSOL пасля крытыкі выплаціць усе сабраныя грошы вызваленым палітвязням
Палітвязні, вызваленыя 11 верасня / LookByMedia
Фонд BYSOL пасля крытыкі ў сацсетках вырашыў цалкам выплаціць палітвязням сабраныя пасля апошняга вызвалення грошы. У арганізацыі прызналі памылку ў рашэнні зарэзерваваць 60 тысяч еўра і выплаціць толькі 50 тысяч.
"Мы ўлічылі заўвагі і крытыку, яшчэ раз прааналізавалі папярэдняе рашэнне BYSOL. […]
На жаль, у тэксце збору гэтыя планы не былі проста прапісаныя. Мы прызнаем гэтую памылку і разумеем, што многія данацілі ўжо пасля дасягнення мэты ў 50 тыс. еўра, каб дапамога для вызваленых была большай", — заяўляюць у фондзе.
У BYSOL кажуць, што гатовыя пачаць выплаты найбліжэйшым часам. Уся сума будзе падзеленая на 52 чалавекі.
"У нас ёсць прамы кантакт з 34 з іх. Мы прыкладаем усе намаганні, каб звязацца з астатнімі вызваленымі. Яны таксама могуць звязацца з намі непасрэдна праз кантакт у Telegram: @bysol_pzk".
