Еўрапейскія лідары выказваюць падтрымку Зяленскаму пасля сваркі з Трампам

Еўрапейскія лідары выказваюць словы падтрымкі Уладзіміру Зяленскаму пасля яго сваркі з Дональдам Трампам у жывым эфіры.

Зяленскі прыбыў у Белы дом падпісваць пагадненне аб рэдказямельных металах. Аднак Трамп пачаў папікаць яго ў прысутнасці журналістаў. Украінскі прэзідэнт таксама рэзка адказаў. У выніку пагадненне не было падпісанае, а сумесную прэс-канферэнцыю прэзідэнтаў адмянілі.

"Ёсць агрэсар — Расія, ёсць народ, які зазнаў агрэсію, — Украіна. Я думаю, што мы ўсе мелі рацыю, дапамагаючы Украіне і ўводзячы санкцыі супраць Расіі тры гады таму, і працягваем гэта рабіць (...) І трэба падзякаваць усім, хто дапамагаў, і паважаць тых, хто з самага пачатку змагаецца", — прыводзіць AFP словы французскага прэзідэнта Эманюэля Макрона, які цяпер знаходзіцца з дзяржвізітам у Партугаліі.

Прэм'ер-міністр Польшчы Дональд Туск ў сваім акаўнце ў сацсетках Х таксама выказаў падтрымку Украіне: "Дарагі @ZelenskyyUa, дарагія ўкраінскія сябры, вы не адны".