Дзяржсакратар ЗША папярэдзіў Пуціна

Дзяржсакратар ЗША Марка Рубіа папярэдзіў Уладзіміра Пуціна, каб той не зацягваў перамовы. “Цяпер мы глядзім на дзеянні, а не на словы”, — сказаў ён пасля саміту міністраў замежных спраў краін NATO.

Прэзідэнт ЗША Дональд Трамп не збіраецца "трапляць у пастку бясконцых перамоваў" з Расіяй па Украіне, падкрэсліў Рубіа. Паводле яго слоў, амерыканскае кіраўніцтва "даволі хутка даведаецца", ці цягне РФ час у перамовах з нагоды мірнага пагаднення. Дзяржсакратар ЗША лічыць, што гэта стане зразумела "на працягу некалькіх тыдняў".

Вашынгтон назірае за дзеяннямі Крамля. Калі Расія будзе зацягваць перамовы, ЗША зменяць тактыку паводзін. Гаворка можа ісці пра "агрэсіўнае выкарыстанне санкцый".

Што да Украіны, то яна "прадэманстравала гатоўнасць" да перамоваў.