Два мужчыны на Брэстчыне памерлі ад укусаў насякомых

У Пінскім і Івацэвіцкім раёнах Брэсцкай вобласці зафіксаваныя смяротныя ўкусы насякомых, паведамляе Дзяржаўны камітэт судовых экспертызаў.

У канцы ліпеня шэршань укусіў 51-гадовага жыхара Пінскага раёна. Мужчына зайшоў у дом і яшчэ паспеў сказаць жонцы, што яго ў двары ўкусіла казурка. Пасля гэтага ён паваліўся. Медыкі, якія прыбылі на выклік, канстатавалі смерць мужчыны.

Падобны трагічны выпадак здарыўся ў Івацэвіцкім раёне. Жыхар Пінска прыехаў забраць пляменніка. Нечакана 67-гадовага мужчыну ў руку ўджаліла пчала. Мужчына дастаў джала, але праз непрацяглы час адчуў боль у раёне ўкусу. Пенсіянер дайшоў да машыны і зваліўся. Выратаваць яго не ўдалося.

Эксперты высветлілі, што абодва мужчыны памерлі ад анафілактычнага шоку на ўкус насякомых.