Для супрацоўнікаў КДБ і іх сем'яў у Мінску будуюць медцэнтр за 15 млн долараў

У Мінску на вуліцы Макаёнка, 13 будуюць спецыяльны медцэнтр для супрацоўнікаў Камітэта дзяржбяспекі ды іх сем'яў. Будоўля вядзецца па асабістай просьбе старшыні КДБ Івана Тэртэля.

Дакументы наконт будаўніцтва з дапамогай BELPOL атрымаў праект Digital intelligence team. Згодна з імі, на будаўніцтва і абсталяванне цэнтра збіраюцца выдаткаваць больш за 15 мільёнаў долараў "спонсарскіх" сродкаў.

Тэртэль звярнуўся да тагачаснага міністра аховы здароўя Дзмітрыя Піневіча 9 лістапада 2023 года. Ён папрасіў пабудаваць медцэнтр, бо супрацоўнікі і ветэраны КДБ (а таксама члены іх сем'яў) маюць патрэбу ў "павышэнні якасці аказання медыцынскай дапамогі". Прапанову ўхвалілі за тры дні. 11 лістапада таго ж года Піневіч падпісаў загад пра будаўніцтва "будынка спецыялізаванай аховы здароўя і сацыяльных паслуг".

У якасці крыніцы фінансавання праекта піневіч адзначыў "спонсарскія сродкі". Але ў дакуменце не ўказваецца, хто канкрэтна стаў "спонсарам".

Пляцоўку пад медцэнтр выбралі каля амбулаторнага Цэнтра ваенна-медыцынскага ўпраўлення КДБ у Мінску — гэта ўчастак плошчай 0,47 га. Плануецца, што ў клініцы будзе тры паверхі (адзін падземны), агульная плошча будынка — 1980 кв.м.

Будаўніцтва пачалося ў красавіку 2024 года. Завяршыць яго планавалі яшчэ ў снежні таго ж года, але, як піша "Зеркало", працы па будынку яшчэ працягваюцца.

У каштарысе пазначаная сума на ўзвядзенне будынка — 31,7 мільёна рублёў, ці 9,75 мільёна долараў (згодна з сярэднегадавым курсам Нацбанка за 2024 год). Аснашчэнне цэнтра абышлося яшчэ ў 20,86 мільёна рублёў (каля 6,38 мільёна долараў).

У будынку запланаваныя:
працэдурная МРТ;
працэдурная КТ;
працэдурная мамаграфіі;
працэдурная РК. Конусные-прамянёвая тамаграфія;
пакой экстранай дапамогі;
кабінет ЭКГ;
два кабінеты ультрагукавой дыягностыкі;
кабінет электранейраміяграфіі (сучасны метад інструментальнай дыягностыкі, які дазваляе вызначыць скарачальную здольнасць цягліц і стан нервовай сістэмы).