Лекар патлумачыў фэйк пра смерць пацыента ад "дактароў, якія не ведалі польскай"

У Польшчы каторы дзень абмяркоўваюць гучную гісторыю пра смерць пацыента ва Уроцлаве. Нібыта, мужчына памёр падчас МРТ, бо лекары з Украіны і Беларусі дрэнна ведалі польскую мову.

Гэтую гісторыю ўжо абвергла польская пракуратура. Па каментар выданне MOST звярнулася да старшыні Ніжнесілезскай лекарскай палаты Паўла Урублеўскага, з чыйго інтэрв'ю і пачаўся скандал.

Гэтую гісторыю Урублеўскі расказаў у інтэрв'ю аднаму з youtube-каналаў. Нібыта, у прыватнай дыягнастычнай лабараторыі ва Уроцлаве пацыенту рабілі МРТ брушной поласці з кантрастам. Брыгада, якая складалася з медыкаў з Украіны і Беларусі кепска ведала польскую мову і не зразумела, што раней у яго ўжо быў анафілактычны шок. Калі ў пацыента пачаўся анафілактычны шок, супрацоўнікі лабараторыі, маўляў, не ведалі, што з ім рабіць і як выклікаць хуткую.

Як заявілі ў акруговай пракуратуры Уроцлава, трагедыя адбылася ў студзені 2023 года. Пацыент перад абследаваннем не паведаміў пра хранічныя захворванні і алергіі. Даследаванне без кантрасту прайшло добра. А пасля ўвядзення 10 мілілітраў кантрасту ў мужчыны пачаўся анафілактычны шок. Медперсанал і доктар адразу ж заняліся яго рэанімацыяй, тэхнічны работнік пастаянна кансультаваўся з дыспетчарам хуткай дапамогі. Пасля прыбыцця брыгады хуткай дапамогі рэанімацыю працягнулі парамедыкі. Аднак у лякарні пацыент памёр.

"Насамрэч з гэтага раздзьмулі вялікі скандал. Факт у тым, што да нядаўняга часу Міністэрства аховы здароўя выдавала дазволы на працу лекарам, якія не валодаюць польскай мовай, а з нядаўніх часоў патрабуецца валоданне на ўзроўні B1, чаго абсалютна недастаткова для добрасумленнага збору ў пацыента анамнезу. Каб звярнуць увагу на тое, якімі могуць быць наступствы, я прывёў прыклад двухгадовай даўнасці, які тады атрымаў шырокі рэзананс", — каментуе Павел Урублеўскі ў адказе для выдання MOST.

Ён сцвярджае, што журналісты перакруцілі яго словы, каб раздзьмуць сенсацыю:

"Я нічога не казаў пра лекараў, толькі пра "беларуска-ўкраінскую брыгаду", бо такую інфармацыю пачуў падчас візіту на Radio Wrocław ад юрыста, які сцвярджаў, што ведае справу. Усю астатнюю гісторыю, на жаль, дадумалі прагныя да сенсацый журналісты".