Ціханоўская: Час забыць выраз "слабы пол"

У Міжнародны жаночы дзень Святлана Ціханоўская звярнулася да беларусак, назваўшы іх сваёй апорай і гонарам.

"У часы, калі жанчыны ладзяць антываенны супраціў, узначальваюць палітычныя і грамадскія рухі, вядуць за сабой народы, час забыць выраз "слабы пол". Мы не ахвяры рэпрэсіяў і прыгнёту. Мы таксама змагаемся за роўныя магчымасці, справядлівасць і дэмакратыю. Сёння мы ўслаўляем жаночую стойкасць, рашучасць і самаадданасць, нагадваючы свету пра нашыя выдатныя дасягненні", — сказала дэмакратычная лідарка.

У відэазвароце яна таксама ўзгадала пра выбітных жанчын, з якімі перасякалася ў апошнія гады:

"Мы шмат гадоў абмяркоўвалі бар'еры, якія вымушаны пераадольваць жанчыны ў палітыцы, складанасці і стэрэатыпы, з якімі мы сутыкаемся. І праз гэта, я думаю, праходзілі амаль усе — ад Святланы Алексіевіч да Раберты Метсолы, ад Каці Сныцінай да Каі Калас, ад Наталлі Пінчук да Уршулі фон дэр Ляен. І кожная гісторыя паказвае, што салідарнасць і ўзаемападтрымка жанчын мацнейшая за любыя стэрэатыпы". 

8 сакавіка адзначаюць ва ўсім свеце. Гэты дзень — напамін пра поўнасць правоў мужчын і жанчын.