Ціханоўская адказала на планы рэжыму абвясціць АПК "тэрарыстычнай арганізацыяй"

Святлана Ціханоўская пракаментавала намер рэжыму Лукашэнкі абвясціць Аб’яднаны пераходны кабінет "тэрарыстычнай арганізацыяй". Яна назвала гэтае дзеянне яшчэ адной дэманстрацыяй бездапаможнасці рэжыму.

"Яны навешваюць ярлыкі экстрэмістаў і тэрарыстаў на людзей, якія клапоцяцца і змагаюцца за інтарэсы беларускага народа. Для іх "тэрарысты" — гэта ўсе, хто супрацьстаіць беззаконню, дапамагае рэпрэсаваным, распаўсюджвае праўду", — падкрэсліла лідарка беларускіх дэмсілаў.

30 красавіка Генеральная пракуратура накіравала ў Вярхоўны суд заяву з просьбай прызнаць "тэрарыстычнай арганізацыяй" Аб'яднаны пераходны кабінет з усімі яго структурнымі падраздзяленнямі. Сярод іншых "абвінавачанняў" на адрас АПК фігуравала і дапамога палку Каліноўскага.

"Аб’яднаны Пераходны Кабінет быў створаны, каб абараняць незалежнасць Беларусі, дамагацца вызвалення палітвязняў, падтрымліваць рэпрэсаваных і рыхтаваць мірны пераход улады да дэмакратыі. Мы змагаемся не зброяй, а праўдай, салідарнасцю і міжнароднай падтрымкай", — заявіла Ціханоўская.

Яна адзначыла, што АПК працягне працу па ўсіх напрамках — нацыянальная бяспека, сацыяльная дапамога, культурнае адраджэнне, моладзевая палітыка, міжнародныя справы і падрыхтоўка транзіту ўлады.