Чынаўнікі расказалі, чаму не хочуць, каб "экстрымісты" працавалі з дзецьмі

Чынаўнікі хочуць абараніць дзяцей "ад гвалту ў любым яго праяўленні". Так тлумачыў новы законапраект, што забараніў працаваць з дзецьмі ўсім беларусам, якія здзяйснілі "злачынствы экстрэмісцкай накіраванасці", старшыня Палаты прадстаўнікоў Нацыянальнага сходу Ігар Сяргеенка.

Такія тлумачэнні Сяргеенка даў, выступаючы перад супрацоўнікамі Мінскага дзяржаўнага каледжа лічбавых тэхналогій, заўважыў "Позірк".

Гэта азначае, што калі педагог быў асуджаны па палітычным артыкуле, ён ужо не зможа вярнуцца ў школу. Таксама працаваць з дзецьмі будзе нельга тым, хто адбываў пакаранне за незаконны абарот наркотыкаў.

Законапраект прадугледжвае магчымасць правесці псіхалагічнае інтэрв’ю з людзьмі, якія плануюць працаваць або ўжо працуюць з дзецьмі. Але ў дакуменце гаворыцца, што гэта права, а не абавязак наймальніка.