Брытанскаму акцёру Расэлу Брэнду выставілі абвінавачванне ў згвалтаванні

Брытанскаму акцёру Расэлу Брэнду выставілі абвінавачванне ў згвалтаванні і гвалтоўных дзеяннях сексуальнага характару ў дачыненні да чатырох жанчын у 1999-2005 гадах, паведамляе "Бі-Бі-Сі". Гэтаму папярэднічала расследаванне 2023 года, якое сумесна правялі газеты Times, Sunday Times і тэлеканал Channel 4.

Брэнду выставілі абвінавачванні паводле пяці пунктаў, расследаванне працягваецца. У судзе акцёра чакаюць 2 траўня.

Мяркуецца, што на сённяшні дзень Расэл Брэнд можа знаходзіцца ў ЗША. Калі ён не вернецца ў Вялікабрытанію, яго чакае экстрадыцыя.

Сам акцёр адмаўляе абвінавачванні ў свой адрас.

Расэл Брэнд пачынаў сваю кар'еру як стэндап-комік, а затым працаваў на тэлеканале MTV і радыёстанцыі BBC Radio 2. Да сярэдзіны 2000-х ён стаў адным з самых запатрабаваных шоўменаў у Вялікабрытаніі. Нярэдка аказваўся ў цэнтры скандалаў. 

У 2010-2012 гадах Брэнд быў у шлюбе са спявачкай Кэці Пэры.

У апошнія гады Расэл Брэнд вядзе канал у YouTube і дзяліцца ў ім тэорыямі змовы.