Больш за 60% студэнтаў БДУ лічаць дапушчальным аднаполы шлюб
Студэнты, архіўнае фота / Еўрарадыё
Беларуская моладзь значна больш талерантная за расійскую. Пра гэта Еўрарадыё даведалася са зборніка навуковых прац БДУ.
У межах даследавання каштоўнасцяў былі апытаныя студэнты БДУ і адной з расійскіх ВНУ. Вялікай розніцы ў поглядах на працу ці самарэалізацыю не было, а вось па тэме стаўлення да аднаполых стасункаў і шлюбаў сацыёлагаў чакаў сюрпрыз.
"Сярод расійскіх студэнтаў гэтыя каштоўнасці лічаць дапушчальнымі адпаведна 35% і 32% апытаных. У той жа час нетрадыцыйная сексуальная арыентацыя з’яўляецца прымальнай для 65,1% беларускіх рэспандэнтаў, а 61,5% апытаных лічаць дапушчальным аднаполы шлюб", — пішуць аўтары артыкула ў зборніку прац па выніках навуковай канферэнцыі.
Заўважная розніца выявілася і ў гендарных стэрэатыпах. Палова расійскіх студэнтаў пагадзілася, што "мужчына павінен займацца кар’ерай, а жанчына — займацца сямейным ачагом". Сярод беларускай моладзі з такім тэзісам не пагадзіліся 75,8%.
