Белпол: Анжаліка Мельнікава дакладна вылятала ў Вялікабрытанію

Белпол не можа пацвердзіць, што Анжаліка Мельнікава знаходзіцца ў Беларусі — гэтую версію раней агучвала арганізацыя Аляксандра Азарава Байпол.

— Нават праваахоўныя органы Польшчы не могуць адназначна сказаць, дзе знаходзіцца Мельнікава. Мы дакладна ведаем, што яна паляцела ў Вялікабрытанію, і гэта нелагічна — ляцець у Вялікабрытанію, каб потым вяртацца ў Беларусь, — сказаў Уладзімір Жыгар у размове з Еўрарадыё.

На думку прадстаўніка арганізацыі, Мельнікава магла маральна выгарэць і "сысці ў закат". Зрэшты, не выключаюцца і іншыя варыянты таго, што здарылася.

Пракаментаваў прадстаўнік Белпол і вызначэнне знаходжання тэлефона Мельнікавай — па заяве Паўла Латушкі, "тэхнічным спосабам было ўстаноўлена", што з 19 сакавіка яе смартфон знаходзіцца ў Беларусі. Але што за "тэхнічны спосаб" — кіраўнік НАУ не ўдакладняў. Жыгар мае сваю версію:

— Калі чалавек адмініструе нейкі чат закрыты, то ў іншых адміністратараў ёсць магчымасць паглядзець месца, хто адкуль апошні раз заходзіў у той ці іншы акаўнт. Калі вы выкарыстоўваеце VPN, то гэта можа быць любое месца. І яно б адлюстравала, што яна зайшла з Беларусі. Але мы не бачылі ніякіх пацверджанняў таго, што кажа спадар Латушка. Калі б пацверджанні былі, іншая справа была б.