Беларуса-кіроўцу пад наркотыкамі затрымалі ў Варшаве
У Варшаве затрымалі кіроўцу-беларуса / miejskireporter.pl
Паліцыя Варшавы затрымала беларуса, які спрабаваў уцячы ад патрульных і ўчыніў ДТЗ. Пра здарэнне піша выданне Miejski Reporter.
Інцыдэнт здарыўся 4 траўня каля гадзіны ночы. Паліцыянты паспрабавалі спыніць BMW для праверкі. Аднак кіроўца замест прыпынку толькі паскорыў рух, спрабуючы ўцячы ад паліцыянтаў. Тыя пачалі пагоню.
На плошчы Pięciu Rogów кіроўца ўрэзаўся ў бетонную лаўку, выскачыў з аўтамабіля і паспрабаваў уцячы пешшу. Затрымаць яго паліцыянты здолелі праз некалькі сотняў метраў, на плошчы Паўстанцаў Варшавы. Для затрымання ўцекача давялося выкарыстаць спецыяльныя сродкі.
Кіроўцам аказаўся 37-гадовы грамадзянін Беларусі. У мужчыны не было пасведчаня кіроўцы, і сам ён быў пад уздзеяннем адурманьваючых сродкаў. У багажніку аўтамабіля паліцыянты выявілі наркотыкі.
