Беларусь высылае чэшскага дыпламата

Афіцыйны Мінск абвясціў персонай нон грата чэшскага дыпламата. Дарадца амбасады павінен цягам 72 гадзін пакінуць Беларусь

Афіцыйны прадстаўнік МЗС Беларусі Руслан Варанкоў падкрэсліў, што гэта крок у адказ на высылку беларускага дыпламата з Чэхіі. "Як вам ужо вядома, нядаўна ўлады Рэспублікі Польшча і Чэшскай Рэспублікі па абсалютна надуманых і беспадстаўных падставах прапанавалі пакінуць тэрыторыю сваіх дзяржаў беларускім дыпламатам у рангу дарадцы", — перадае БЕЛТА яго словы.

Акрамя кіраўніка чэшскай дыпламатычнай місіі сёння ў МЗС выклікалі і часовага паверанага ў справах Польшчы ў Беларусі. З ім, як заяўляюць у МЗС, адбылася грунтоўная размова на тэму цяперашняга стану беларуска-польскіх адносін, аднак пра высылку польскага дыпламата гаворкі не было.

"Беларускі бок лічыць на гэтым дыпламатычны інцыдэнт вычарпаным. У выпадку далейшай эскалацыі Беларусь будзе рэагаваць адэкватна. Дадзеная пазіцыя даведзеная да ведама Варшавы і Прагі", — дадаў афіцыйны прадстаўнік беларускага МЗС.

Высылка дыпламатаў лукашэнкаўскага рэжыму з Чэхіі ды Польшчы адбылася пасля таго, як у некалькіх краінах Еўропы выявілі шпіёнскую сетку беларускага КДБ. Дыпламатаў абвінавацілі ў дзейнасці, несумяшчальнай з іх статусам — прасцей кажучы, у шпіянажы.