Стала вядома, у чым падазраюць беларуску, якая запускала дрон у Варшаве

Варшава афіцыйна апавясціла Мінск, што ў Польшчы затрымалі грамадзянку нашай краіны. Яе падазраюць у выкарыстанні дрона ў зоне дзеяння забароны на ажыццяўленне палётаў, а таксама ў стварэнні пагрозы для бяспекі і правапарадку. Пра гэта расказалі ў прэс-службе МЗС Беларусі.

Таксама ў беларускім ведамстве заявілі, што інцыдэнт разглядаецца "ў адміністрацыйна-прававой плоскасці".

У МЗС Беларусі падкрэслілі, што не ўмешваюцца ў працэсуальныя дзеянні, якія праводзяць праваахоўнікі Польшчы, і паабяцалі беларусцы консульскую дапамогу пры неабходнасці.

Увечары 15 верасня стала вядома пра запуск дрона над урадавымі будынкамі і рэзідэнцыяй прэзідэнта ў цэнтры Варшавы. Спярша паведамлялася пра затрыманне двух грамадзян Беларусі, пазней стала вядома, што гаворка ідзе пра 21-гадовага ўкраінца і 17-гадовую беларуску. Маладыя людзі запускалі назіральны дрон над паркам Лазенкі. Паводле папярэдніх высноваў польскіх спецслужбаў, маладыя людзі не займаліся шпіянажам.