Армія Пакістана заявіла аб вызваленні больш за 300 закладнікаў
У цягніку былі сотні закладнікаў / Getty Images
Армія Пакістана заявіла аб вызваленні ў правінцыі Белуджыстан больш за 300 закладнікаў. Яны былі ў пасажырскім цягніку, які ў аўторак захапілі сепаратысты з "Арміі вызвалення Белуджыстана" (групоўка прызнана тэрарыстычнай у ЕС, ЗША і Вялікабрытаніі). Падчас аперацыі забітыя 33 баевікі. Вайскоўцы працягваюць "зачыстку" наваколля, паведамляе "Бі-Бі-Сі".
Баевікі спынілі цягнік, падарваўшы ўчастак чыгункі каля ўваходу ў тунэль. Пасля гэтага пачалася перастрэлка — сілавікі, якія былі ў цягніку аказвалі супраціўленне. Адзін са сведкаў кажа, што бачыў пасля перастрэлкі каля 60 трупаў — і сілавікоў, і мірных жыхароў. Вядома, што ў цягніку было каля 400 чалавек.
Сепаратысты з "Арміі вызвалення Белуджыстана" патрабавалі вызваліць "палітычных зняволеных-белуджаў", інакш пагражалі забіваць закладнікаў. Для вызвалення закладнікаў пасылаліся падраздзяленні Арміі Пакістана.
