Апублікаваныя рассакрэчаныя дакументы аб забойстве прэзідэнта Джона Кенэдзі

Апублікаваныя рассакрэчаныя дакументы аб забойстве 35-га амерыканскага прэзідэнта Джона Кенэдзі. Нацыянальны архіў ЗША выканаў нядаўняе распараджэнне прэзідэнта Дональда Трампа. Па словах Трампа, стануць даступнымі каля 80 тысяч старонак дагэтуль сакрэтных дакументаў. Нацыянальны архіў паведамляе пра 1123 дакументы.

З 18 сакавіка доступ да запісаў можна атрымаць альбо анлайн на старонцы Нацыянальнага архіва ЗША, альбо асабіста, у друкаваным выглядзе ў архіве ў штаце Мэрыленд. Дакументы будуць публікавацца па меры іх аблічбоўкі.

Ніякіх сенсацый там не знайшлі. У дакументах згадваецца тэлефанаванне невядомага, які прадставіўся польскім кіроўцам пасольства СССР, у амерыканскую амбасаду ў Аўстраліі. Ён сцвярджаў, што "савецкі ўрад фінансаваў замах" і нібыта было абяцанае ўзнагароджанне ў памеры 100 тысяч долараў за забойства. Аўстралійскія ўлады лічылі таго, хто патэлефанаваў, "псіхічна неўраўнаважаным". Яго асобу высветліць не змаглі.

Джон Кенэдзі быў застрэлены праз два гады пасля абрання прэзідэнтам ЗША — 22 лістапада 1963 года падчас афіцыйнага візіту ў Далас (штат Тэхас). Па падазрэнні ў забойстве арыштавалі былога марпеха Лі Харві Освальда, які нейкі час жыў у Беларусі (потым расчараваўся ў СССР, вярнуўся ў ЗША і стаў галоўным абвінавачваным у забойстве Кенэдзі). Але праз тры дні ён быў застрэлены. Як піша Reuters, некаторыя дакументы адлюстроўваюць працу следчых, якія хацелі даведацца больш пра жыццё Освальда ў Савецкім Саюзе.

Архіўныя дакументы аб забойстве Джона Кэнэдзі рассакрэчвалі і раней.