Аналітык Арцём Шрайбман пракаментаваў хамскія выпады СТБ у дачыненні да Пуціна

Аналітык Арцём Шрайбман пракаментаваў хамскія выказванні ў адрас прэзідэнта Расіі Уладзіміра Пуціна, якія прагучалі ў эфіры беларускага тэлеканала СТБ.

Супрацоўнік тэлеканала Яўген Пуставой, разважаючы пра стаўленне Аляксандра Лукашэнкі да пандэміі СOVID-19, сказаў, што Лукашэнка — "адзіны прэзідэнт, які не хаваўся ад народа па бункерах, а ад міністраў і журналістаў з дапамогай тэлеканферэнцый". У іншай рэпліцы вядучы сказаў, што ў беларускага кіраўніка "бяссонныя ночы і перажыванні адбіваліся на твары. Ботаксам не карыстаецца". Пазней і сам Пуставой, і праўладныя тэлеграм-каналы пачалі актыўна пісаць, што гаворка ў спічы ішла не пра Пуціна, а пра чамусьці прэзідэнта ЗША Джо Байдэна.

Шрайбман выказаў здагадку, што хамскія выпады ў дачыненні да расійскага прэзідэнта не звязаныя з якой-небудзь камандай з адміністрацыі Лукашэнкі. Гэта чыстая ініцыятыва журналістаў, жаданне спадабацца босу.

"Замахнуцца на Пуціна, прычым адразу з казыроў пра ботаксы і бункеры, гэта вядома новы ўзровень. Самі хутка адчулі, што страцілі берагі, і пачалі адкручваць, маўляў, мы пра Байдэна так жартавалі, а вы што, на Пуціна падумалі? Ну дык, гэта Вы значыць дрэнныя, а не мы", — піша Шрайбман.

На думку аналітыка, Лукашэнка заўсёды было важна "вылучыцца менавіта на фоне расійскай улады".

"А паколькі ў яго нядаўна здарыўся новы ўсплёск барацьбы з барацьбой з кавідам, верным байцам з СТБ было важна падтрымаць ягоную эмоцыю", — адзначыў Шрайбман. На ягоную думку, "нават калі б гэтыя пасажы выклікалі міжнародны скандал і закранулі б асабіста Пуціна, гэта не скасавала б таго простага факту, што Пуставой выдатна зрабіў тую працу, на якую ён наняты".

На думку аналітыка, няма сумневаў, што Лукашэнку гэты спіч спадабаўся.