Адміністратарку беларускай Вікіпедыі асудзілі на 10 сутак

Рэдактарцы беларускай Вікіпедыі Вользе Сітнік прысудзілі 10 сутак арышту. Раней ужо з'яўляліся паведамленні пра пераслед за рэдагаванне Вікіпедыі.

Сітнік вядомая пад нікам Хомелка. 17 красавіка яна знікла — раптоўна перастала правіць артыкулы і выходзіць на сувязь. Меркавалася, што яе затрымалі. Як піша "Наша Ніва", у той дзень Вольгу затрымлівалі, але адпусцілі дадому. А тыдзень таму яе затрымалі зноў і на 10 сутак адправілі на Акрэсціна.

Вольга Сітнік — хатняя гаспадыня з Мінска, у яе трое непаўналетніх дзяцей. У Вікіпедыі яна з 2009 года піша пра беларускую традыцыйную культуру і прыроду, а таксама на такія тэмы, як грудное выкормліванне. З 2010 года Сітнік бесперапынна з'яўляецца адміністратаркай беларускай Вікіпедыі.

Гэта не адзіны выпадак пераследу рэдактараў Вікіпедыі за апошнія месяцы. 13 сакавіка 2025 года знік Kazimier Lachnovič (сапраўднае імя невядомае) — адзін з чатырох адміністратараў "тарашкевічнай" Вікіпедыі. Сувязі з ім дагэтуль няма. Не выключана, што яго затрымалі па крымінальнай справе.

Пры ім у раздзеле запісалі, што адзінай дзяржаўнай мовай Беларусі называецца беларуская, дзяржаўным сцягам — бела-чырвона-белы, гербам — Пагоня. Лукашэнка называецца "кіраўніком акупацыйнай адміністрацыі". Беларускія вікі-рэдактары мяркуюць, што гэта магло прыцягнуць увагу сілавікоў.

Праз тыдзень пасля знікнення Ляхновіча прапагандыстка Людміла Гладкая назвала Вікіпедыю зброяй масавага паражэння супраць краін постсавецкай прасторы і заявіла, што беларускі раздзел рэдагуецца з Польшчы.