Адміністрацыя Трампа абмяркоўвае з Мінскам вызваленне яшчэ 100 вязняў — Reuters

Адміністрацыя Дональда Трампа і рэжым Лукашэнкі абмяркоўваюць магчымае вызваленне ў Беларусі не менш як 100 палітвязняў бліжэйшым часам. Пра гэта паведамляе інфармагенцтва Reuters са спасылкай на тры крыніцы, знаёмыя з сітуацыяй.

Вызваленне афіцыйныя асобы ЗША плануюць у рамках адзінай здзелкі. Ключавой асобай ЗША на перамовах называюць Джона Коўла, якога Трамп нядаўна прызначыў спецпрадстаўніком па Беларусі.

Пакуль невядома, якія менавіта вязні могуць выйсці на волю і калі менавіта гэта можа адбыцца. Белы дом ад каментароў адмовіўся, а амбасада Беларусі ў Вашынгтоне не адказала на запыт Reuters.

Раней добрыя навіны пра палітвязняў цягам бліжэйшых тыдняў анансавала Святлана Ціханоўская.

У каментары Reuters некаторыя афіцыйныя асобы ЗША сказалі, што ўзаемадзеянне адміністрацыі прэзідэнта ЗША з рэжымам Лукашэнкі — гэта частка доўгатэрміновай, больш шырокай стратэгіі вываду Мінска з геапалітычнай арбіты Масквы, хай нават і нязначнай. Нават невялікую пераарыентацыю рэжыму Лукашэнкі на захад там разглядаюць як стратэгічную перамогу.