Ацяпленне пасля аварыі далі не ўсім мінчукам
Батарэя, ілюстрацыйнае фота / БЕЛТА
Зранку 20 студзеня многія мінчукі працягвалі скардзіцца на тое, што ім так і не аднавілі падачу цяпла пасля аварыі на цепламагістралі.
Як піша дзяржаўнае выданне "Мінская праўда", такія скаргі паступалі з Фрунзенскага (раён Каменная Горка) і Кастрычніцкага (вуліца Чкалава) раёнаў сталіцы.
Вялікая аварыя на цеплатрасе ў Мінску здарылася 19 студзеня. Без ацяплення засталося больш за тры тысячы дамоў у Кастрычніцкім, Маскоўскім, Савецкім, Фрунзенскім і Цэнтральным раёнах. Увечары таго ж дня міністр энергетыкі Дзяніс Мароз заявіў, што аварыю ліквідавалі, магістраль адрамантавалі, а цеплазабеспячэнне аднавілі ў ільвінай долі дамоў праз часовую схему.
Аднак многія мінчукі скардзяцца, што ацяплення так і няма, хаця падача гарачай вады ўзнавілася.
Зранку 20 студзеня Мінэнерга паведаміла, што рамонтныя работы на цепламагістралі працягваюцца, пашкоджаны ўчастак цеплатрасы дэмантуюць.
