Аб'яднаны Пераходны кабінет назваў умовы для зняцця санкцый

Аб'яднаны Пераходны кабінет (АПК) выпрацаваў агульную пазіцыю наконт зняцця санкцый з рэжыму Лукашэнкі.

Сваю пазіцыю Кабінет апублікаваў 20 лютага. У ёй вылучаныя тры ўмовы для зняцця санкцый:

1. Поўнае спыненне палітычных рэпрэсій з боку рэжыму Лукашэнкі;
2. Поўнае вызваленне ўсіх палітвязняў, спыненне іх крымінальнага і адміністрацыйнага пераследу, адмена незаконных прысудаўы. Вызваленым палітвязням павінен быць дадзены выбар — застацца ў Беларусі ці выехаць за яе межы.
3. Поўная дэкрыміналізацыя палітычнай і грамадскай дзейнасці, а таксама працы незалежных СМІ. "У Рэспубліцы Беларусь павінна быць адноўленае дзеянне прававой сістэмы, якая забяспечвае належную павагу да правоў чалавека", — заяўляюць у АПК.

Пры выкананні гэтых умоваў, мяркуюць у АПК, "частка санкцыяў ЗША можа быць паэтапна прыпыненая, каб пераканацца ў тым, што рэжым належным чынам выконвае ўзятыя на сябе абавязацельствы".

Адначасова Кабінет падтрымлівае дзеянні Еўрасаюза, накіраваныя на працяг санкцыйнага ціску на рэжым Лукашэнкі за парушэнне правоў чалавека і саўдзел у агрэсіі супраць Украіны.