Журналістку Паліну Піткевіч прызналі палітзняволенай

Колькасць палітвязняў у Беларусі павялічылася на шэсць чалавек. Беларускія праваабаронцы дадалі ў спіс Яўгена Бойку, Аляксандра Краўчука, Паліну Піткевіч, Арцёма Палякова, Вадзіма Сенчанку і Максіма Бельчанку. Яны лічаць іх справы палітычна матываванымі і патрабуюць вызвалення.

Пра арышт у Беларусі журналісткі Піткевіч стала вядома некалькі дзён таму. 7 сакавіка яе крымінальную справу аб удзеле ў "экстрэмісцкім фармаванні" будзе разглядаць Мінскі гарадскі суд.

Бойка ўзяты пад варту паводле абвінавачвання ў "садзейнічанні экстрэмісцкай дзейнасці". Краўчук асуджаны па такім жа абвінавачванні на 4 гады і 6 месяцаў пазбаўлення волі ў папраўчай калоніі. Палякоў асуджаны паводле абвінавачвання "ва ўдзеле ў экстрэмісцкім фармаванні" і "садзейнічанні экстрэмісцкай дзейнасці" да пазбаўлення волі ў папраўчай калоніі. Сенчанка асуджаны па абвінавачванні ў "фінансаванні экстрэмісцкай дзейнасці" на 3 гады і 6 месяцаў папраўчай калоніі. Бельчанка асуджаны паводле абвінавачвання ў "садзейнічанні экстрэмісцкай дзейнасці" і "махлярстве" на тры гады калоніі.

У РБ на сённяшні дзень налічваецца 1232 палітычных зняволеных.