За тры дні затрыманыя дзве групы сутэнёраў, якія вывозілі гамяльчанак у Расію

За тры дні аператыўнікі ўпраўлення па наркакантролі і супрацьдзеянні гандлю людзьмі затрымалі дзве групы сутэнёраў. Як паведамляе УУС Гомельскага аблвыканкама, каналы вывазу гамяльчанак з Беларусі для сэксуальнай эксплуатацыі не былі звязаныя паміж сабой.

Адну з груп арганізаваў непрацуючы жыхар горада Сокал Валагодскай вобласці, 1978 года нараджэння. Ён прыцягваў жанчын для занятку прастытуцыяй на тэрыторыі Расіі.

Дзве гамяльчанкі былі ўведзеныя ў зман абяцанымі заробкамі. Але план перапраўкі будучых сэкс-рабынь праваліўся 2 кастрычніка 2018 года. У Добрушскім раёне на мяжы Беларусі і Расіі аўто з расіянінам і дзяўчатамі было затрыманае.

Праз тры дні, 5 кастрычніка 2018 года, у вёсцы Галавінцы Гомельскага раёна аператыўнікі пры падтрымцы байцоў АМАПа спынілі аўтамабіль на расійскіх нумарах, якім кіраваў грамадзянін РФ 1993 года нараджэння. У салоне машыны знаходзіліся яшчэ двое грамадзян Расійскай Федэрацыі, непрацуючыя жыхары горада Навазыбкаў Бранскай вобласці.

Папярэдне ўстаноўлена, што з ліпеня расіяне прапаноўвалі жыхаркам Гомеля і раёна працу ў прэстыжных гатэлях і сэкс-эскорце за немалыя грошы. І гэтая схема дала збой у момант перапраўкі дзвюх жыхарак вобласці ў Расію.

Арганізатары каналаў вывазу дзяўчат затрыманыя. На іх заведзеныя крымінальныя справы па частцы 2 артыкула 171 Крымінальнага кодэкса Беларусі. Арганізацыя і (або) выкарыстанне занятку прастытуцыяй альбо стварэнне ўмоваў для занятку прастытуцыяй, спалучаныя з вывазам за межы дзяржавы асобы для занятку прастытуцыяй, караюцца пазбаўленнем волі на тэрмін ад пяці да дзесяці гадоў з канфіскацыяй маёмасці.