За грашовыя пераводы палітвязням будуць судзіць 47-гадовую жыхарку Салігорска

47-гадовая жанчына з Салігорска трапіла пад суд за грашовыя пераводы палітвязням. Пра гэта паведаміў старшы пракурор аддзела пракуратуры Мінскай вобласці Валерый Мядзел, піша праваабарончы цэнтр "Вясна".

Жанчыну вінавацяць у "садзейнічанні экстрэмісцкай дзейнасці" — маўляў, яна дапамагала "экстрэмісцкім фармаванням Dissidentby, ПЦ "Вясна" і "Лісты Салідарнасці Беларусь 2020". Як заяўляе следства, яна зрабіла не менш за 70 грашовых пераводаў на агульную суму каля 600 рублёў на адрас 54 чалавек. Усе яны знаходзяцца ў зняволенні паводле палітычных артыкулаў — як гэта называе пракурор, "за ўчыненне злачынстваў экстрэмісцкай накіраванасці".

Жыхарку Салігорска ўзялі пад варту. Яе справу накіравалі ў Мінскі абласны суд.