Украіна выбрала кандыдата на "Еўрабачанне-2025"

На конкурсе “Еўрабачанне-2025” Украіну прадставіць гурт Ziferblat з песняй Bird of Pray. 8 лютага ён стаў пераможцам нацыянальнага этапа адбору, паведамляе BBC.

Гледачы ацанілі гурт максімальна — у 10 балаў. Прафесійныя суддзі з музычнай індустрыі паставілі дзевяць балаў. 

У складзе Ziferblat выступаюць браты-блізняты Данііл Ляшчынскі (вакаліст) і Валянцін Ляшчынскі (гітара), а таксама бубнач Фёдар Хадакоў. Усе трое — з Кіева.

Ziferblat у 2024 годзе таксама ўдзельнічаў у адборы, але заняў другое месца.

У 2025 годзе конкурс адбудзецца ў швейцарскім Базелі ў другой палове траўня.

Нагадаем, што ў польскім фінале Еўрабачання прагучыць песня "Lusterka" дуэта Niczos і SW@da на падляшскай мове.

Niczos і SW@da — гэта Ніка Юрчук і Віктар Шчыгель. Ніка родам з Бельска-Падляскага, Віктар — з Беластока, але мае калумбійскія карані. Іх музыка заснавана на унікальнай культуры Падляшша і спалучае традыцыйныя спевы з клубнымі аранжыроўкамі і рэпам.

Еўрарадыё ў канцы 2024 года зрабіла вялікае інтэрв’ю з дуэтам.

Польскі фінал адбору Еўрабачання адбудзецца 14 лютага на канале TVP2. Пераможцу выберуць сярод дзесяці калектываў і выканаўцаў шляхам глядацкага галасавання, у якім змогуць удзельнічаць і беларусы, якія знаходзяцца ў Польшчы.

Нагадаем, што з 2021 года Беларусь не ўдзельнічае ў конкурсе Еўрабачанне ў сувязі з прыпыненнем членства Белтэлерадыёкампаніі ў Еўрапейскім вяшчальным саюзе. У 2024 годзе прыпыненне членства зрабілі без тэрміну, пакуль сітуацыя ў краіне не палепшыцца.