Украіна не будзе прызнаваць Данбас расійскім ні дэ-юрэ, ні дэ-факта — Зяленскі
Уладзімір Зяленскі / LRT
Украіна не будзе прызнаваць тэрыторыю Данбаса расійскай ні дэ-юрэ, ні дэ-факта. Пра гэта Уладзімір Зяленскі заявіў у размове з журналістамі.
Прэзідэнт Украіны паведаміў, што ЗША прапануюць стварыць на Данбасе свабодную эканамічную зону і "спрабуюць знайсці кампраміс" па гэтай тэрыторыі. Пытанне тэрыторый абмяркоўвалася на перамовах з Злучанымі Штатамі.
"Ні дэ-юрэ, ні дэ-факта мы прызнаваць Данбас расійскім не будзем, тую частку, якая часова акупаваная. Аднак мы прагаворым пытанне адносна тэрыторыі. Вы ведаеце, што яно — адно з ключавых, у гэтым пытанні ў нас пакуль кансенсусу няма", — перадае hromadske.ua словы Зяленскага.
Раней выданне Politico пісала, што ЗША патрабуюць ад Украіны ў рамках патэнцыйнага мірнага пагаднення пакінуць не захопленую расіянамі тэрыторыю Данецкай вобласці, да гэтага ж імкнецца і Расія. Зяленскі заяўляў, што Украіна не разглядае магчымасць перадачы якіх-небудзь сваіх тэрыторый, бо гэтага не дазваляюць ні нацыянальнае заканадаўства, ні міжнароднае права.
